Марий Элыште эн сай Патырым сайленыт

        Марий Элыште эн сай патырым сайленыт. Республике кӱкшытан «Марий Патыр» виш конкурсышто сеҥыше- влакын лӱмыштым каласыме. Мероприятийым Марий талешке кече кышкарыште эртарыме. Таҥасымаш марий да финн-угор археолог, историй шанче доктор, профессор, академик Валерий Патрушевын лекций-презентацийже гыч тӱҥалын. Тудо экспедицийлаште верештме кугезе тукымнан тӱрлӧ курымласе тӱвыра да сурт кӧргӧ, илышыште кучылтмо шуэш вашлиялтше ӱзгарже- влак дене палдарен. Марий патыр лӱмым налшаш верч школышто да вузышто тунемше, пашам ыштыше шым самырык рвезе таҥасен. Нуно калыкле йӱлам, сарзе да шочмо элым йӧратыме шӱлышеш ямдылалтмым ончыктеныт. Полшышо- влак дене пырля армийыш ужатыме, У суртыш илаш пурымо, сӱан мелна, изарня кас, Кугечым вашлийме, кылымдым пӱчмӧ, ачан эргыжлан сугыньым пуымыжо йӱла- влакым ончыктеныт. Усталык номер семын шкешт да йӧратыме пашашт нерген каласкаленыт. Конкурсын Гран-прижым Волжский районысо Карай тӱвыра пӧртын «Шийгорно» ансамбльыш коштшыжо, гармоньчо Сергей Савинов сеҥен налын. Озаҥ ола гыч чолга еҥ, самырык- влакын «Лай мардеж» марий ансамбльын участникше Александр Гавриловлан икымше вер логалын, Юлтехын студентше, художественный самодеятельностьын чолга еҥже, гармоньчо Никита Козлов кокымшо лийын. Кумшо верыш Волжский район гыч, Юлтехын магистрантше Андрей Кудрявцев лектын. Тыгак Унчо школ гыч Никита Ксенофонтов «Йӱлам пагалыше» номинацийыште палемдалтын, У Торъял Токстарсола школ гыч Родион Небогатиков «Чумбылатын вийже» номинацийыште, «Марий Памаш» ансамбльын да «У еҥ» ансмабльын участникышт Дмитрий Горинов «Мурышо марий патыр» номинацийыште ойыртемалтыныт.
         Фото: Марий тӱвыра рӱдер.