Марий Элым вуйлатыше Юрий Зайцев аэропорт комплексым пужен ыштыме йодыш дене совещанийым эртарен

             Йошкар-Оласе аэропортын чоҥештен кӱзымӧ да волен шичме полосажым пужен ыштымаш утларак комфортабельный да кугу юж судно- влакым шындаш йӧным пуа. Марий Элым вуйлатыше Юрий Зайцев аэропорт комплексым пужен ыштыме йодыш дене совещанийым эртарен. Погынышо- влак чоҥымо да монтаж пашам шуктымо вариант- влакым да объектым эксплуатацийыш вашкерак пурташ темлымаш- влакым каҥашеныт. Кызыт у пассажир терминал чоҥалтеш, объект 50 процентлан ямде. Тудым идалык мучашлан ыштен шукташ шонат. Федерал финансирований полшымо дене рулитлыме корно, командно-диспетчер пунктын у зданийжым чоҥымаш, самолёт- влак шогымо верым, вӱд йогымо да дренаж сетьын объектше- влакым, моло инфраструктурым ыштыме лиеш. Контракт почеш пашам 2027-ше ийлан мучашлышаш улыт. Правительстве чоҥымо жапым кӱчыкемдыме пашам шукта. Чоҥештен кӱзымӧ да волен шичме полосам пужен ыштыме ден терминалым чоҥымо пашам иканаште шукташ федерал кучем келшен. Тидлан ешартыш окса кӱлеш. Пужен ыштыме деч вара полосан кужытшо кок тӱжемат 701 метр лиеш, кумдыкшо 42 метр. Тидыже 200 еҥ пурыман самолёт- влакым шындаш да авиарейсым ешараш йӧным пуа.
             Фото: Марий Элым вуйлатышын  администрацийжын увер дене пашам ыштыше пӧлкаже.