Шернур сырзавод производствыжым уэмден толеш
Шернур сырзаводышто кызытсе производствым модернизироватлыме шотышто инвестиций проект сайын шыҥдаралтеш. Проектым 2024-ше ий марте шыҥдарышаш улыт. Инвестицийын кугытшо 784 миллион утла теҥге. Тудын кышкарыште технологий да энергетик оборудованийым налаш палемдыме Кодшо ийын лектышыже почеш 94 миллион наре теҥге инвестицийым кучылтмо, 26 пашаверым ыштыме, республикысе бюджетыш налог окса шукырак пурен. Предприятийыште Республикым вуйлатыше Александр Евстифеев лийын. Пытартыш кок ият пеле жапыште технологий радам дене 100 наре процентлан уэмын. Тудо чыла шӧрын денат кылдалтын: сырьем налмаш, тудым тергымаш, переработко, упаковко, маркировка, аралыме жапым кугемдымаш. Йодмаш пеш кугу. Кодшо ийын пандемий тӱналмеке, завод кугу ола- влаклан сату дене кугун полшен. Молан манаш гын, тунам сатум ятыр налаш тӱҥалыныт.- каласен Александр Евстифеев. Шернур сырзаводын сатужым йодмаш ятыр тӱнямбал контракт дене пеҥгыдемдалтеш. «Шернур сырзавод» ЗАО-н директоржо- влакын советыштым вуйлатыше Владимир Кожанов главалан каласен: завод кызыт шке сатужым экспортыш колташ кугу пашам виктара. Кызыт таможенный союз элла да Объединённый Араб Эмиратыш экспортёр семын аттестаций мучашлалтын. Заводын 9 тӱрлӧ сыржым Моско кундемыште регистрироватлалтше ужалкалыше компаний гоч Эмиратын ужалкалыме сетьышкыже колташ палемдыме. Завод чылаже 150 утла тӱрлӧ сатум луктеш. Шке сатум ужалыме 41 кевытше уло. Тушечын 23-шо Марий Элыште верланен. Сырын тоштерже почылтын, сырлавке уло. Тушто пӱтынь ассортментым ончыктымо. Александр Евстифеев тыгак предприятийым вуйлатыше- влакын социал политикыштым палемден. Тушто чыла пашам чын радамлыме, куандарыше пашадар, эрласе кечылан ӱшан уло. Республикым вуйлатыше Владимир Кожановлан тауштен ойлен да предприятийын коллектившылан сеҥымаш- влакым тыланен.