Зашижемье селаште у ФАП-ым почмо

                Александр Евстифеев кап-кылыштыже антителан ситышын улмыж нерген увертарен. Тидын нерген тудо Шернур районысо Зашижемье селаште ФАП-ым почмо годым ойлен Вӱрым тергымаш Ковидлан антителан кӱкшӧ улмыжым ончыктен. Сандене кызытеш вакцинацийын кӱлешлыкше уке манын. Мутат уке, прививкым ышташ шонем. Молан манаш гын, шуко еҥ дене, предприятий вуйлатыше-шамыч, коллективла, самырык тукым дене шуко вашлияш верештеш. Сандене тергашлан вӱрым чӱчкыдын сдатлем. Кызытеш антителам ситыше, иктыланат лӱдыкшым ом лук. Кунам кӱлеш лиеш, прививкым вигак ыштыктем,- каласен республикым вуйлатыше. У фельдшер-акушер пунктым «Тазалыкаралтыш» калыкле проект кышкарыште чоҥымо. Тудо куд ял гыч 521 еҥлан полышым пуаш тӱҥалеш. Объектын тичмаш акше куд миллионат 500 тӱжем теҥгем эртен. ФАП-ыште вигак коронавирус инфекций деч вакцинацийым ышташ тӱҥалыныт. Ик эн ончыч Зашижемье кыдалаш школ гыч туныктышо Валентина Лапина ыштыктен. Процедура сайын эртен. Туныктышо тыгай медицина тӧнежым ыштымлан республикым вуйлатышылан тауштен ойлен. А вуйлатыше шке велымже чоҥышо- влакым мокталтен. Тудо тыгак республикыште тазалыкаралтышым вияҥдыме нерген ойлен.
                 Тиддеч посна тудо Шернурысо рӱдӧ эмлыме верыштат лийын. Тушто йоча пӧлкаште олмыктымо пашам шуктымо, у оборудованийым налме. Оборудованийым моло пӧлкашкат налаш палемдыме. Тичмаш налмаште рӱдӧ эмлыме верын колектившын пашажым кӱкшын аклен.
Фото: https://www.marpravda.ru/