Шернур район гыч марий ӱдырамаш 100 ийым темен

                         Марий Элыште илыше Анна Кутузова  100 ияш лӱмгечыжым палемден. Шернур район гыч ӱдырамаш шке ийготшым ончыде, пеҥгыде тазалыкан, весела да поро кумылан улеш. Верысе калыкат тыге ойла: тудо эре шыргыжеш, сандене кужу ӱмыран. Тудо кызыт ӱдыржӧ дене ила, 12 уныкаже да шым кугезе уныкаже уло. Марий кочкышым пеш йӧрата, муралтенат, кушталтенат, гармонь денат шокталтен кертеш. Тудо 1921-ше ийын кумшо апрельыше Кугенер кундемысе Кӱчыкэҥер ялыште шочын. Изиж годсек колхозышто пашам ыштен, тунемаш жапше лийын огыл. Ялысе рвезылан марлан лектын. Но тудым фронтыш налыныт, мӧҥгыш 1947-ше ийыште гына пӧртылын. Марийже дене 6  йочам ончен-куштеныт. Кызытсе семын нигунам пулвуйыш кидым пыштен шинчыме огыл, эре пашам ышташ верештын,- ойла тудо. Лӱмгече озам саламлаш республикысе социал вияҥмаш министр Марина Островская, Шернур район администрацийым вуйлатыше Александр Кугергин да молат миеныт. Нуно Россий Президентын да Марий Элым вуйлатышын лӱман саламлымашыштым, шергакан пӧлек ден пеледыш аршашым кучыктеныт.