Сергей Волчков Йошкар-Ола гыч 6-шо классыште тунемше Дмитрий Тимофеевлан грамотым кучыктен

             Сергей Волчков Йошкар-Ола гыч 6-шо классыште тунемше Дмитрий Тимофеевлан грамотым кучыктен. Российын эл кӧргӧ паша министрже Владимир Колокольцев онлайн режим дене патырлыкым да лӱддымылыкым ончыктышо ийготыш шудымо йоча- влаклан наградым кучыктымо церемонийым эртарен. Йочам аралыме Тӱнямбал кечылан пӧлеклалтше мероприятийыште элысе 14 кундме гыч ийготыш шудымо 14 еҥ участвоватлен. Нунын коклаште Йошкар-Ола гыч 13 ияш Дмитрий Тимофеев лийын. Тудын тӱткылыкшӧ да ура чонан улмыжлан кӧра икымше классыште тунемше ӱдырын смарфонжым шолыштшо еҥым полицейский- влак вашке кучен да доказатлен кертыныт. Владимир Колокольцев палемден 14 еҥ гыч иктыжат чытырен, лӱдын шоген огыл, грамотно да чаткан ыштен. Таче Республикын Эл кӧргӧ паша министрже, полицийын генерал-майоржо Сергей Волчков Дималан Россий МВД-н Почётан Грамотыжым да шергакан пӧлекым кучыктен.
      Марий Элысе МВД пресс-службын фотожо.