Тунемше- влакын «Лӱдыкшыдымылык школ» («Самырык утарыше») регион кӱкшытан таҥасымашышт мучашлалтын

          Тунемше- влакын «Лӱдыкшыдымылык школ» («Самырык утарыше») регион кӱкшытан таҥасымашышт мучашлалтын. Команде- влак вич кече мучко таҥасеныт. Чылаже 21 команда да Саратов областьын командыже моштымашыштым ончыктеныт. Самырык таҥасыше- влак альпинист ямдылалтмашлан тыршен тунеммыштым, тулым йӧртымӧ да утарыше оборудований дене пайдаланен моштымыштым, икымше полышым пуымо, верыште ориентирований, чодыраште илен лекме, кочкышым ямдылыме мастарлыкышт дене таҥасеныт. Эн нелыже «Илен лекме маршрут», «Кычал-утарыме паша», «Комбинированный пожар эстафета» лийыныт. Лач нуно сеҥыше- влакым рашемденыт. Кугурак ийготан- влак коклаште икымше верым Курык марий районын, кокымшым Йошкар-Оласе 29-ше школын, кумшым Волжскысо «Защитник» усталык рӱдерын командышт налыныт. Изирак ийготан- влак коклаште ончылно Шернур районын, кокымшо верыште Куженер районын, кумшышт Йошкар-Оласе 29-ше школын командышт лийыныт.
           Граждан оборона да вучыдымо ситуаций комитетын фотожо.