Калыкым шотлымашын икымше лектышыже пале лийын

             Кодшо ийын Российысе калыкым шотлымашын икымше лектышыже пале лийын. Перепись Элыште кӧн кузе илымыже, илыме йӧнжӧ, калыкын шинчымашыже, йылмым палымыже, могай калыкын илымыже, еш нерген тичмаш уверым пален налме ик эн ӱшанле йӧнлан шотлалтеш. Тудо тыгак элым социал-экономик велым ончыкыжо вияҥдыме йӧным рашемдаш полша. Шотлымашын икымше лектышыже почеш Российысе калык 2010-шо ий дене таҥастарымаште кок миллион утла еҥлан ешаралтын. Миллион еҥ илыман ола- влак шукемыныт. Тиде жапыште ныл ола- Краснодар, Красноярск, Пермь да Воронежыште илыште- влак миллион еҥыш шуыныт. Ынде тыгайже 16 ола лийын. Эн шуко еҥ илыман кундем- влакым рашемдыме. Тиде Моско ден Моско область, Краснодар край, Санкт-Петербург, Свердловск да Ростов область, Башкортостан ден Татарстан республике- влак. Тушо уло элын ик кумшо ужаш калыкше ила. Российыште урбанизаций умбакыже шуйна: 75 процент калык олаште, 25 процент ялыште ила. Переписьын тичмаш лектышыже тений 31-ше декабрь марте пале лийшаш.
        Марий Элыште оласе калык вич утла процентлан ешаралтын, но пӱтынь республикысе калык шагалемын. Республикыштына 677 тӱжем еҥ ила. Нунын кокла гыч 463 тӱжемже- олаште, 214 тӱжемже ялыште илат. 2010-шо ийысе деч республикысе калык 2,7 луаш процентлан шагалрак лийын.