Рӱдӧ оласе Прохоров уремыште магистраль трубопроводын ужашыжым умбакыже вашталтат

              «Т Плюс» компанийын Марий Элысе да Чувашийысе филиалже  Рӱдӧ оласе Индешымше микрорайонын Прохоров уремыштыже  магистраль трубопроводын черетан ужашыжым умбакыже вашталта. Компаний кум ияш проектым ӱмаште тӱналын ыле. Тиде паша шокшым да шокшо вӱдым пуымо качествым саемдаш полша. Тений компаний нылымше номеран поликлинике деч Бауман урем марте 460 метр кужытышто пучым уэмда. Тиддеч посна тудо уремым асфальтироватлыме годым урем гоч вончемым ышта. Тиде пашалан 42 миллион теҥге кайышаш. Пашам сентябрь мучашлан пытараш палемдыме. Тиде жапыште шокшо вӱдым вес схеме дене колтат. 2021-ше-2023-шо ийлаште чылаже «Т Плюс» компаний Строитель урем деч Ужар урем марте тӱжемат 600 метр тепломагистральым вашталта. Тиде пашалан 100 миллион теҥге кайышаш.
        Фото: «МедиаПоток».