Йошкар-Олан кандашымше микрорайоныштыжо сквер у тӱсым налеш

          Йошкар-Олан кандашымше микрорайоныштыжо сквер у тӱсым налеш. Тӱзландарыме паша Воин- интернационалист- влак скверыште да Куйбышев уремысе тротуарыште 29-ше деч 59-ше пӧрт марте ышталтеш. Тиде объект приоритет радамыш пурен ыле. Мэрийын увертарымыже почеш, чыла вийым кӱчык жапыште тиде кундемым пужен ыштымашке виктарыме. Тымарте южо вере брусчаткым шарыме, бордюр кӱым вераҥдыме. Тыге йолгорнын кузе вераҥдалтшашыже рашемын. Проектын икымше йыжыҥыштыже у йолешке да велосипед корно- влак, барбекю зона, автомобильым шогалтен кодымо вер да контейнер площадке- влакым ыштат. Тыгак изи архитектур формо- влак лийыт, тулым пуртат, кушкылым шындат. Мэрийыште умылтарыме почеш тений кандаш тӱшка кумдыкым тӱзландараш палемдыме. Кажне объектыштыжат паша шукталтеш.
             Фото: «Ваш Новый День» газет.