Илыме верым тений кок пачаш шукырак пашаш колтымо

          Илыме верым пашаш колтымаш тений кок пачаш ешаралтын. Чоҥымаш да «Илыме вер» регионысо программым шыҥдарыме дене республике кӱкшӧ лектышым ончыктышо 20 регион радамыш пура. Тенийсе вич тылзыште 202 тӱжем квадрат мер илыме верым ыштен шуктымо але талукаш планын 52 процентшым. Тидыже кодшо ийысе деч ятырлан шукырак. А тений идалык мучаш марте 390 тӱжем квадрат метрым ыштен шуктышаш улыт. 2022-шо- 2024-ше ий- влаклан палемдыме лимит почеш калыкле да федерал проект- влакым илышыш шыҥдарыме йодышым теҥгече элысе кундем- влакым вияҥдыме шотышто Правительство комиссий Президиумын заседанийыштыже каҥашыме. Тушто Марий Элым вуйлатышын сомылыжым жаплан шуктышо Юрий Зайцев лийын. Тачысе кечылан республикыште регионысо проект- влаклан ныл миллиардат 200 миллион теҥгем ойырымо. Чоҥашлан контрактым пӱтынек ыштыме, 14 объектыште паша шукталтеш. Тошто пӧртла гыч калыкым кусарыме программе почеш кок тӱжемат 975 еҥым але планын 88 процентшым кусарыме, 45 тӱжем наре квадрат метр аварийный илыме верым кораҥдыме.
             Фото: Марий Элым вуйлатышын организаций да аналитик виктемже.