Сад да пакча пашам каҥашыме

                      Партийын верысе пӧлкаже семинар-совещанийыште сад да пакча пашам вияҥдыме да тудлан полышым пуымо шотышто республикысе законым  ямдылыме йодышым каҥашен. Семинарыште сад товариществе- влакын вуйлатышышт, Кугыжаныш Погынын депутатышт, министерстве ден ведомствылан, муниципал образованийлан еҥышт лийыныт. Шошо шуын, ынде сад-пакчам кучышо- влакын тургым пагытышт лишемеш. «Российысе садовод- влак» ушемын республикысе пӧлкажым вуйлатыше Геннадий Петрушин палемден: республикыштына сад-пакчалан ныл тӱжемат 500 утла гектар мландым ойырымо. Тушто 100 утла коммерцийдыме сад товариществе- влак верланеныт. Тидым тичмаш отрасль манаш лиеш. Сандене тудын социал кӱлешлыкше койын шога. Садовод- влакын проблемышт нерген 2017-ше ийыште келгын ойлаш тӱҥалме. Транспортым ешарыме, олаште уто пакча-саскам ужалыме вер- влак ышталтыныт, электроозанлыкым кучымылан окса нелытым шагалемдаш тӱҥалме. Но моло йодышат кодеш. Мутлан, товариществе- влакын статусышт- ялат огыл, олат огыл; кудалтыме участке- влак, кадастр учёт, купыш савырнымаш да вӱдым йоктарен колтымо йодыш. Калыкым шупшыктымо йодышым чаткан виктарыман, садыш наҥгайыше корно- влакын озаштым рашемдыман. Кучемын полышыжо деч посна нине йодышым виктарен колташ неле,- каласен Петрушин. Товариществе- влак шке статусыштлан кӧра кугыжаныш полышым налын огыт керт. А республикысе закон верысе кӱкшытыштӧ тиде правам пуэн кертеш. Сандене «Сад да пакча пашалан вияҥме да полшымо нерген» республикын законжым пеҥгыдемдыман. Тудым калык дене каҥашыман да чынжымак калыкын законжым ыштыман. Тидым сайлан шотлымо да у законопроектым ямдылаш пашаче группым ышташ лийме.
Фото:  http://mari-el.gov.ru/