Республикысе Пеледыш пайремын программыже

           Йошкар-Олаште Пеледыш пайремым палемдыме программым савыктыме. Тидын лӱмеш 17-ше-18-ше июньышто ятыр мероприятий лиеш. Программе кугарнянак почылтеш. Патриарший площадьыште 18 шагатлан Башкортостан гыч толшо артист- влакын концертышт лиеш. Пайрем кечын 18-ше июньышто вигак икмыняр мероприятий эрта. Лу шагатлан Ленин лӱмеш тӱвыра полат ончылно уна- влак вашлийыт да 11 шагатлан пайремыш таҥошкыл тарванат. 11 шагатат 45 минутлан Ленин лӱмеш площадьыште Россий кӱкшытан фестиваль почылтеш 17 шагатлан Башкортостан гыч марий эстрада артист- влакын концертышт, 19 шагатлан этнодискотека лиеш. Рӱдӧ каныме паркыш пурымшате 12 шагатлан уна- влакым вашлийме йӱла эрта, паркын эстрада аланыштыже 13 шагатлан ретро концерт, пел шагат гыч гармонист- влакын фестивальышт, 17 шагатат 30 минутлан Марий кас тӱҥалеш. Паркын Тулото аланыштыже 12 шагатат 45 минутышто фольклор коллектив- влакын концертышт лиеш, 16 гыч 16 шагатат 45 минут марте марий патыр- влакын модмашышт эрта, вара концерт умбакыже шуйна. Тулото алан воктене шагатат пеле гыч «Черемис модмаш» спорт таҥасымаш, 14 гыч да 16 шагат гыч «Йоча тӱня» мероприятий лиеш. Рӱдӧ паркын аллейыштыже 11 шагат гыч «Кудо» конкурсым ончаш лиеш. Сеҥымаш Паркыште 15 шагатлан «Шашлык пайрем» тӱҥалеш.