Марий Элым вуйлатыше должностьыш сайлалташ кум еҥ документым пуэн

           Юрий Зайцев Марий Элым вуйлатыше должностьыш икымше кандидат лийын. Россий кечын Марий Элым вуйлатышын сомылжым шуктышо республикысе Рӱдӧ сайлыме комиссийыш документым пуэн. Юрий Зайцев сайлымашке шкенжым шке темлыше семын ушна. ЦИК-ын пашаче группыжо документ- влакым налын, тидын шотышто справкым пуэн да Юрий Зайцевлан ушештарен: ынде муниципал образованийлан представительный органыштын депутатыштын да сайлыше- влакын подписьыштым погыман. 
           Тыгак Марий Элым вуйлатышым сайлымашке пенсионер-влакын партийышт шкеныштын регионысо пӧлкаштым вуйлатыше Валентина Злобинам  луктын. Тудат документ- влакым ЦИК-ыш пуэн. Тудо 70 ияш, Пенсионер- влак партийын регионысо пӧлкажым 2004-ше ий гыч вуйлата. 
            Тиддеч посна ЛДПР Марий Элым вуйлатышым сайлымашке партийын регионысо пӧлкажын координаторжо Антон Мирбадалевым кандидат семын луктын. Тудо марий парламентыште ЛДПР фракцийым вуйлата. Республикым вуйлатышым сайлымаш йӱклымӧ единый кечын- 11-ше сентябрьыште эрта.
             Фото: Марий Элым вуйлатышын организаций да аналитик виктемже.