Кадровый донор Евгений Волжанин «Донор толкынлан полшымаш» медаль дене палемдалтын

          Йошкар-Ола гыч Республикысе вӱрым налме да пуымо станцийын кадровый доноржо Евгений  Волжанин Российын федерал медико- биологий агентствыжын «Донор толкынлан полшымаш» медальже дене палемдалтын. Кировысо гематологий да вӱрым вес еҥлан колтышо научно-шымлыше институтшо Российысе Пирогов лӱмеш медицина университетын клиникыжын  чот черланыше пациентшын илышыжым арален кодаш манын луысо вуйдорыкын клеткыжым кусарен шындыме шотышто ойыртемалтше операцийым ыштен. Пациентын родо-тукымжо коклаште келшыше донор лектын огыл. Евгений Волжанин родо огыл, но шке кумылын кӧнен, пӱтынек келшен толшо донор лийын. Кировысо НИИ-н директоржо Парамонов шке тауштымашан серышыштыже возен: палыдыме мӱндыр еҥлан илышыжым утарен кодаш манын, те шкендан кап-кылдан ужашыжым пӧлекленда. Тендан поро кумылланда, еҥ ойгым шижын моштымыланда, шӱм –чон поянлыкланда кӧра мемнан тӱняна эше ик илыш дене поянрак лиеш.