Марий Элым вуйлатышын сомылжым шуктышо Юрий Зайцев «Звениговский» агрохолингыш миен

       «Мемнан идеологийна икте- шочмо элым йӧратымаш»- Юрий Зайцев, Юрий Афонин ден Сергей Казанков «Звениговский» озанлыкыште вашлиймаште аграрный отрасльым вияҥдыме йодышым каҥашеныт. Марий Элым вуйлатышын сомылжым шуктышо Юрий Зайцев «Звениговский» агрохолингыш миен. Озанлыкым вуйлатыше- влак уна-шамычым шокшын вашлийыныт. Нунын коклаште Кугыжаныш Думын депутатше, КПРФ-ын рӱдӧ комитетшым вуйлатышын икымше алмаштышыже Юрий Афонин ден республикын ял озанлык министрже Андрей Кондратенко лийыныт. Юрий Зайцев консерве, шыл, колбаса цехлаште лийын, шӧр цехыште лумэгерчым- мороженыйым тамлен ончен. СПК-н председательже Иван Казанковын мутшо почеш предприятийыште ик суткаште 50-60 тӱжем консерве банкым ыштен луктыт, 130 тӱрлӧ колбаса сатум, 160 тӱрлӧ полуфабрикатым ямдылат.
          Тиддеч посна Марий Элым вуйлатышын сомылжым шуктышо Морко районысо Шерегановышто кум тӱжемат 600 вуйлан чоҥалтше шӧр комплексым, Кугу Шальыште фермым да «Звениговский» шыл комбинатшым ончен. Тудо палемден: «Звениговский» ял озанлык предприятийын вияҥмыже республикылан моткоч кӱлешан. Сандене чоҥымаште, у производствым почмаште кучем орган полышым пуышаш. Предприятий республикым вуйлатышылан келшен.
             Мучашлан тудо каласен: экономикым вияҥдымаште тыршыше- влакым ик цель ушен шога. Ме ик пашам шуктена, ик элыште илена, шонымашнат икте- Российын да тудын калыкшын улан илышыже. Могай партий корно дене огына кае гынат, пашана икте, пырля гына ме сеҥымашке шуына. Идеологийнат икте- шочмо элнам йӧратымаш. Пашанам тиде шонымаш денак виктараш тӱҥалына,- каласен Юрий Зайцев.
             Фото: Марий Элым вуйлатышын организаций да аналитик виктемже.