Ракет дивизийын Марий Элыште верланымыжлан 60 ий темын
Кодшо шуматкечын 14-ше ракет дивизийын боевой дежурствыш шогалмыжлан 60 ий темын. Марий Элым вуйлатыше Александр Евстифеев шкенжын да Правительствын лӱмжӧ дене кумшо степень Кутузов орденан Киевско-Житомирский ракет дивизийын личный составше дене командованийжым боевой дежурствыш шогалымжлан 60 ий темме дене саламлен. Кодшо курымын кыдалныже стратегический назначениян ракет войска элнан ӱшанле эҥертышыже лийын да тачат тудо Россий Вооруженный вийын обороноспособностьшым арален шогымаште кӱлешлыкшым йомдарен огыл. Йошкар-Оласе ракет дивизий 60 ий Марий Эл кундемыште верлана да Ракет войскан ончыл соединенийжылан шотлалтеш. Воин-ракетчик- влак деч шочмо мландынан тыныслыкше шога. Кодшо ийысе шокшо кеҥеж чодыра пожар ваштареш кучедалме денат ушеш кодеш. Тулым йӧртымашке ракет соединенийын военнослужащийже- влакат аклаш лийдыме надырым пыштеныт. Стратегический назначениян ракет войскан командованийже, личный составше, ветеранже- влаклан элнам аралымаште тыршымыштлан кугу таум каласем,- ойлалтеш республикым вуйлатышын саламлымашыштыже.