Тений ЕГЭ икымше гана Федерал Кугыжаныш стандарт почеш эрта

              Тений ЕГЭ икымше гана Федерал Кугыжаныш стандарт почеш эрта. Мо дене тиде кылдалтын? Тений школым икымше класс гычак у ФГОС дене тунемше йоча- влак тунем пытарат. Вес семын каласаш гын, нуным туныктымаште фактым але формулым сайын палымашлан гына огыл тӱткышым ойырымо, а нуным илышыште кучылт моштышт манын тыршыме. Тидын дене келшышын тергыме матераил- влакымат уэмдыме. Могай вашталтыш лиеш? Математике дене экзаменыште шинчымашым практикыште кучылт кертмымат тергат, географий денат шинчымаш дене илышыште пайдаланымашлан тӱткышым ойырат, йот йылме дене тергымаште вес еҥ дене вашмуталнымашым вӱден моштымым ончат. Тиддеч посна, мутлан, биологийыште, физике, химий, географийыште математике шинчымашым ончыкташ верештеш. Тидыжат у: тений ЕГЭ-м вузыш пураш шонышо гына огыл, а чыла выпускник куча.
               Республикыштына ЕГЭ-м сдатлаш кок тӱжемат 812 еҥ возалтын. Тушечын кок тӱжемат 649 еҥже тений школым тунем пытарыше- влак улыт. Экзамен кум йыжыҥ дене эрташ тӱҥалеш. 21-ше март гыч 18-ше апрель марте- досрочный, 26-шо май гыч 2-шо июль марте- тӱҥ, 5 гыч 20-шо сентябрь марте- ешартыш. Ончычсо ийласе выпускник- влак экзаменым досрочный жапыште кучат. Чыла выпускниклан кок предмет- руш йылме дене математике обязательныйлан шотлалтыт.