Сенатор Сергей Мартынов самырык тукымым военно-патриот шӱлышеш шуарыме «Авангард» рӱдерыш миен

                   Федераций Советыште Марий Эл деч представитель, сенатор Сергей Мартынов самырык тукымым военно-патриот шӱлышеш шуарыме «Авангард» рӱдерыш миен. Российын Президентше Владимир Путинын кӱштымыжӧ почеш ыштыме организаций республикысе самырык еҥ- влак коклаште утларак палыме лиеш да йодмаш дене пайдалана. Тушто Элым ончыкыжым аралыше- влакым ямдылат. Армийыш налшаш рвезе- влак тиде лагерь негызеш тунемме сборлашке чумыргат, военный пашан тӱҥалтышыже дене палдарат. «Авангард» рӱдерын профессионал коллективше кеч-могай предметым оҥайын пуаш тырша, тунеммашым ойыртемалтшым да пояным ышта. Рӱдерым вуйлатыше Борис Салдаев Сергей Мартыновлан ойлымыжо годым палемден: тунемме сборышто лицей, ончыл школ- влакын курсант ден кадетышт лийыныт. Сборыш Бауман лицейын, «Обыкновенное чудо» визымше школын, «Канде кайык» гимназийын, Андре Мальро лӱмеш 26-шо номеран гимназийын тунемшышт  толыныт. Рвезе- влак автоматым жаплан рончен-погеныт, спорт таҥасымашлаште участвоватленыт, аралалтме средствым кучылташ тунемыныт. Тактике ямдылалтмашат пура: бойым вӱдымӧ тунемме верыште коштмаш, лӱйкалыме верым ойырен налме, строевой ошкыл дене коштмаш, военный- влак дене мастер класс да молат эртаралтыт. Сергей Мартынов шагатат пеле утла курсант- влак дене вашлиймаште йодыш- влаклан вашештен да пелемден: «Авангард» самырык тукымым патриотизм шӱлышеш шуарымаште кӱлешан задачым шукта, рвезе- влак пайдале опытым погат, шочмо элым йӧратыме кумылым пеҥгыдемдат.
                       Фото: "Марийская правда".