Параньга районышо рӱдӧ эмлыме верын йоча поликлиник пӧлкажым уэмден пытарыме

              Параньга районышо рӱдӧ эмлыме верын йоча поликлиник пӧлкажым уэмден пытарыме. Тудым «Тазалыкаралтыш» калыкле проект кышкарыште олмыктымо. Йоча консультаций кугыеҥ- влаклан поликлиникын ик могырыштыжо изи кумдыкышто верланен ыле. Икмыняр ий ончыч эмлыме верыште азам ыштыме пӧлка петыралтын, олмыктымо деч вара тушко педиатрий поликлиник пӧлка куснен. Районысо тӱҥ педиатр Фирзия Латфуллинан мутшо почеш, кызытсе йӧным ончычсо дене таҥастарашат ок лий. Олмыктымо кум тылзыште пӱтынек окна- влакым вашталтыме, у линолеумым шарыме, йӧнан мебельым налме. Регистратурат вашталтын, чапле прививке кабинет, тушко вакциным аралаш у холодильникым налме. Сай оборудованиян изолятор уло. Тудо пандемий чот шарлыме годым кугу полышым пуэн. Кызыт кум педиатрий участкыште кок тӱжемат 711 йоча шотлалтеш, 87-шылан эше ик ият темын огыл.