Олмыктымо паша окса ситыме семын шукталтеш

                      Йошкар-Оласе тротуар- влакым тичмаш олмыкташ, мутат уке, шийвундо ок сите. Кызыт рӱдӧ олаште урем корнылам чолган олмыктат. Кугу паша «Лӱдыкшыдымӧ качестван автомобиль корно- влак» калыкле проект кышкарыште шукталтеш. Верысе калыкым йолгорно- влакат тургыжландарат. Ола администрацийыште умылтарыме почеш, корно да йолгорнышто улшо йодышан вер- влак раш улыт, но олмыктымо паша улшо оксам шотыш налын шукталтеш. Ятыр тротуаржым 30-40 ий ончычак ыштыме да шукертсек олмыктымашым вучат. Но окса ситыдымаш тиде йодышым тӱшкан кораҥдаш эше йӧным ок пу. Туге гынат, 2017-ше ий годсек тротуар- влакат олмыкталтыт. Мутлан, 2018-ше ийыште 15 участкым тӧрлымӧ, 19-ше ийыште 19 тӱжем квадрат метр наре кумыдкым олмыктымо. Кумдыклам тӱзландарымаш «Оласе йӧнан кумыдкым ыштымаш» федерал программылан кӧра шукталтеш. Толшо окса дене Чавайн бульварын эҥер вес велысе ужашыжым да Сеҥымаш паркым моторемдыме. Кодшо ийын Советский, Больничный, Крылов, Пушкин уремласе тротуарым ачалыме. Федерал программе Свирин скверым да 10 тротуарым тӧрлаш йӧным пуэн. Тений каныме паркыште, «Планета»  кевыт воктене да эше ныл кумдыкышто корно да олыктымо паша шукталтеш.