Олам лум деч эрыктат
Лум шуко луммылан кӧра Йошкар-Олан коммунал службыжым пеҥгыдемдыме режимыш кусарыме ыле. Теҥгече эрденак «Ола» МУП-ын пашаеҥже- влак оласе уремлаш, тротуар дене корным йолын вончымо вер деке намийыше йолгорнылашке шинчал ден ошма вартышым шавеныт. Тидыжым лум луммо годым ий ынже кылме да вигак шулаш тӱҥалже манын ыштыме. Теҥгече 170 тонн тыгай вартышым шавыме. А шинчаллан кӧра шулаш тӱҥалше лум немырым корно тӱрыш шӱкат да вара тудым машинаш оптен наҥгаят. Теҥгече 60 тӱрлӧ спецтехнике пашаш лектын.
