Йошкар-Оласе Лебедев уремым шушаш ийын огыл, а тений олмыкташ тӱҥалыт
Йошкар-Оласе Лебедев уремым 2022-шо ийыште олмыкташ палемдыме ыле, но республикым вуйлатышын шындыме задачыж почеш тиде сомылым тенийлан кусарыме. Карл Либкнехт урем деч Тыныслык урем марте ужашыжым олмыктымо пашам шукташ подряд организацийым рашемдаш манын, конкурс процедурым увертарыме. Олмыктышаш корнын кужытшо ик меҥгат 530 метр. Тушто асфальтын ужашыжым, бордюр кӱым вашталтат, вынем- влакым пужен ыштат, разметкым вераҥдат да газоныш шудым ӱдат. Контрактын тӱҥалтыш акше 55 миллион утла теҥге. Пашам 15-ше апрель гыч тӱҥалаш лийме.
