Александр Евстифеев Йошкар-Оласе ракет дивизийыш миен да ракетчик- влакым пайрем дене саламлен
Теҥгече Элым аралышын кечынже Марий Элым вуйлатыше Александр Евстифеев Йошкар-Оласе Кумшо степень Кутузов орденан 14-ше Киевско- Житомирский ракет дивизийыш миен да ракетчик- влакым пайрем дене саламлен. Марий Элым вуйлатыше кугыжанышнан куатшым шке пашаж дене пеҥгыдемден шогышо, интернационал порысым шуктен, контртеррорист да тыныслыкым ыштыме операцийлаште участвоватлыше- влаклан таум каласен. Тудо ешарен: кызыт кугыжаныш ончылно лӱдыкшӧ- влак лектын шогат, но Российын Президентше Владимир Путинын авторитетше, виян армий, калыкын шочмо элым йӧратыме кумылжылан кӧра Россий вияҥ толшо кугу кучемлан шотлалтеш. Российын правительствыже элнан обороноспособностьшым пеҥгыдемдымылан кугу тӱткышым ойыра. Марий Элнат оборонно-промышленный комплексым вияҥдымашке шке надыржым пышта. Самырык тукымым военно-патриот шӱлышеш шуарымылан, нунын армийыште служитлаш кумылышытым да тазалыкыштым ямдылымылан тӱткыш ойыралтеш. Мемнан кундемыште ракет дивизийын верланымыже кугешнымашым луктеш. Тудо ик гана веле огыл шкенжын кучедалаш ямде улмыжым ончыктен, стратегический назначениян ракет войскан эн сай соединенийже лӱмым сеҥен налын. Александр Евстифеев военнослужащий –влакым да нунын ешыштым пайрем дене саламлен. Марий Элым вуйлатышын Указше дене 34096 войсковой частьын командиржын алмаштышыже Сергей Александровлан «Марий Эл ончылно надырлан» орденын медальжым кучыктымо, икмыняр еҥлан Марий Элым вуйлатышын тауштымашыжым увертарыме. Российын оборона министржын приказше дене келшышын Вооруженный вийын частьлажын ударный соединений войскажын перечньышкыже Йошкар-Оласе дивизийын вич подразделенийже пурен.
