Ял озанлык сатум ыштен лукшо-влак кум миллиард утла теҥгеаш сатум ямдыленыт
Тенийсе январьыште республикысе ял озанлык сатум ыштен лукшо-влак кум миллиард утла теҥгеаш сатум ямдыленыт. Тидыже 2020-шо ийысе тыгаяк жап дене таҥастарымаште 2,7 процентлан шукырак. Продукций утларакше вольык сату ешаралтме кӱшеш кушкын. Тӱҥ шотышто вольык да сурт кайыкым ашнат. Икымше февральлан шотлымаште чыла озанлыкыште тӱкан шолдыра вольыкын чотшо 80 тӱжем утла вуй лийын. Тушечын ушкалже- 29 тӱжем утла, сӧснан чотшо 324 тӱжем вуй, сурткайык 13 миллионым эртен. Тений январьыште вольык дене сурт кайыкым 30 тӱжем тонным, 13 тӱжем тонн шӧрым, 34 миллион наре муным ыштен налме. Эн шуко сурт кайык шылым Советский, Параньга да Медведево районлаште налме. Шӧрым эн шуко Медведево да У Торъял районлаште шупшылыт.
