Ныл у ФАП-ым чоҥен шуктымо

               Морко районысо Унчо селаште у фельдшер-акушер пункт икымше пациент- влакым вашлийын. Тазалыкаралтыш министерствын увертарымыж почеш, йӧнан лийже манын  у ФАП-ым тошто медпункт воктене чоҥымо. Фельдшер ден медшӱжарын паша стажышт 25 ийым эрта. Тиде пунктыш Унчо села, Сапунчо, Шлань, Муканай, Шӱргӧ, Ямбатыр, Паймыр ялла гыч коштыт. Нине илемлаште тӱжемат 622 еҥ ила. Тушечын 402-шо йоча- влак улыт. Пациент- влакым вашлияш Зеленогорскыштат у ФАП ямдылалтеш. Тушто связьым ышташ да компьютер- влакым ушаш гына кодын. Тудат тӱжем утла еҥлан полшаш тӱҥалеш.
                   Шернур районыштат кок фельдшер-акушер пунктым чоҥен шуктымо да черле- влакым вашлияш тӱрыс ямде улыт. Зашижемье села ден Аҥанур ялыште медпунктым «Тазалыкаралтыш» калыкле проект кышкарыште ыштыме. Аҥанур ялыште опытан фельдшер Людмила Долгушева Аҥанур, Купсола, Ош Куп ялла гыч 450 наре еҥлан полышым пуа. Зашижемьеште кудымшо ий Наталья Купсольцева тырша. Тудын кид йымалныже 500 еҥ уло. Нуно Зашижемье, Кукмарий, Кугу да Изи Шопкер, Ошет, Шӱдымарий яллаште илат. Кок объектым чоҥаш 13 миллион утла теҥге оксам кучылтмо
Фото:  sakhalinmedia.ru