Марий Элыште тений 186 меҥге корным норматив марте шуктат
Марий Элыште тений 186 меҥге корным норматив марте шуктат. Теҥгече Республикым вуйлатыше Александр Евстифеев Российысе Кугыжаныш Советын «Транспорт» направлений дене комиссийжын заседанийыштыже лийын. Тудым Россий правительстве председательын алмаштышыже Марат Хуснуллин эртарен. Мутланымаш «Инфраструктурный прорыв» подгруппо кышкарыште Российым социал-экономик могырым вияҥдыме стратегийым ыштыме нерген лийын. Марий Элыште кодшо ийын «Корно сеть» регионысо проект кышкарыште кум миллиардат 432 миллион теҥгем ойырымо. Норматив марте республикысе 152 меҥге корным да Йошкар-Ола агломерацийыш пурышо верысе 18 меҥге корным шуктымо. Тидыже палемдыме пашан 118 да 123 процентше лиеш. Тений «Корно сеть» регионысо проектым шыҥдараш кок миллиардат 876 миллион теҥгем палемдыме. Норматив марте республике кӱкшытан 186 меҥге да верысе 12 меҥге наре корным шуктышаш улыт. У магистральыште паша умбакыше шуйна, Красный Мост- Килемар- Шаранга корнын ужашыже, Аксарке- Марий Ушем, Малая Речка- Кыдал Туршо-Головино, Малая Речка-Пижма- Юж Толешево корнылан ужашыштым олмыкташ лийме. Тенийлан палемдыме 30 контракт гыч тымарте 25 ойпидышым пеҥгыдемдыме але тӱшка кугыт гыч 83 процентшым. «Корно озанлыкым вияҥдыме общесистемный мера» регионысо проектым шыҥдарыме кышкарыште кодшо ийын республикыште 29 фотовидеофиксаций камерым вераҥдыме, Кокшайск-Красногорский корнышто вераҥдыме машинан нелытшым да кугытшым тергыше автомат пунктым пашаш колтымо. Тений тиде проектым шыҥдараш 160 миллион теҥге оксам палемдыме.
