Республикыште чоҥымо паша воранен толеш
Марий Элым вуйлатыше Александр Евстифеев Российысе Кугыжаныш Советын «Чоҥымаш, илыме вер да коммунал озанлык, оласе кумдык» корно дене комиссийжын заседанийыштыже участвоватлен. Тудым Россий Президентын полышкалышыже, ГосСоветын секретарьже Игорь Левитин, Правительстве председательын алмаштышыже Марат Хуснуллин, комиссийым вуйлатыше, Татарстанын президентше Рустам Минниханов эртареныт. Мутланымаш видеоконференцкыл йӧн дене эртен. Тушто палемдыме: 2030-шо ий марте калыкле идейыш шуаш стратегический вияҥме корно- влакым ямдылыме, тумарте вич миллион деч шагал огыл еш илыме йӧнжым саемдышаш. Тидлан ик миллиард квадрат метр илыме верым чоҥыман, идалык еда 120 миллион квадрат метр илыме верым пашаш колташ кӱлеш. Республикыште тений 363 квадрат метрым, вес ийын- 386-ым, 23-шо ийыште 428-ым, 24-ше ийыште 478 квадрат метр илыме верым ыштен шуктыман. Кодшо ийын лектышыже почеш чоҥымаш паша 19 утла процентлан кушкын, но илыме пӧртым ыштен шуктымаш 7 процентлан шагалемын. Регионым писын вияҥдаш манын, 2024-ше ий марте индивидуал программым шыҥдараш тӱҥалме.
