Марий Элыште креатив индустрий Школ почылтеш

                 Марий Элыште креатив индустрий Школ почылтеш. Тунемме тӧнеж Палантай лӱмеш тӱвыра да сымыктыш колледж негызеш ышталтеш да у тунемме ий гыч пашам ышташ тӱҥалеш. Тидын нерген совещанийыште Республикым вуйлатыше Александр Евстифеевлан тӱвыра министр Константин Иванов увертарен. Тиде тема ача- ава- влакым интересоватла, йоча- влаклан шкаланыштат кӱлешан да пайдале. Тиде- шинчымашым пуымо кызытсе жаплан келшыше формо. Кызыт креатив индустрий Школын проектше шымлалтеш. Тиде- тӱвыра аланыште шинчымашым пуымо специальный формат,- каласен Александр Евстифеев. Тӱвыра министрын мутшо почеш. Марий Эл тыгай школым ышташ эртарыме конкурсышто сеҥышыш лекше элысе 33 кундем гыч иктыже. Тудо федерал бюджет гыч 44 миллион теҥгем налын. Конкурсым Российын тӱвыра министерствыже эртарен ыле. Школ Калыкле сымыктыш гимназийын кумшо пачашыштыже верлана. Тидлан тӱжем наре квадрат метр кумдык кучылталтеш, куд студий почылтеш: йӱк режиссурын, анимацийын да 3Д-графикын, кызытсе электрон семын, фото да видео пашан, дизайнын, интерактивный цифран технологийын студийышт. Ойыртемалтше оборудований вераҥдалтеш. Тунемме программе кум ийлан келыштаралтын. Тиде жапыште тудым 600 ӱдыр-рвезе эртышаш. Тушто колледжыште тунемше икшыве- влак гына огыл, а уло республике гыч йоча- влак шинчымашым налаш тӱҥалыт. Районла гыч йоча- влакым кеҥежымсе сменыш кондаш палемдыме. Кызыт тушто олмыктымо пашам шуктыман, технический йӧн дене пойдарыман. А икымше сентябрь гыч Креатив индустрий Школ шке пашажым тӱҥалшаш. Кызытак тудлан кадрым ситарыман,- каласен республикым вуйлатыше. Ынде йоча- влак 11 ий тунемыт. Ик верыштак кыдалаш да кыдалаш-професисонал тичмаш шичнымашым налыт. Тиде аланыште нуно профессионал лийыт,- ешарен тӱвыра министр.