Марий Элым вуйлатыше Российын чоҥымаш министржын эртарыме совещанийыште участвоватлен
Марий Элым вуйлатыше Александр Евстифеев Российын чоҥымаш, илыме вер да коммунал озанлык министрже Ирек Файзуллинын эртарыме совещанийыште участвоватлен. Тушто «Российысе калыклан йӧнан илыме верым да коммунал полышым ситарымаш» кугыжаныш программын посна мероприятийже- влакым шыҥдарыме нерген мутланыме. Республикыштына тиде программе почеш кодшо ийын 136 миллион теҥгеаш ныл объектыште пашам мучашлыме. Тиде Волжск оласе коллектор, Моркысо, Оршанке районысо Шулкысо, Советский районысо Михайловкысо очистной сооружений- влак. Индивидуал программе кышкарыште тений ветеринар лабораторий корпусым чоҥаш тӱҥалаш проектым ыштыме. Илыме вер да коммунал озанлык инфраструктурым уэмдымаште ныл объектым пашаш колтымо: Советский посёлко ден Ашламаш яллаште, Звенигово олаште да Сурок посёлкышто. Волжск олаште азам ыштыме пӧлкам чоҥымаш кая. Йӱшаш вӱдым ситараш кум объектыште пашам шуктымо. Йошкар-Олаште кок объектым чоҥаш але пужен ышташ палемдыме: коллектор ден КНС-ым. Йӱшаш вӱдым ситарыме шотышто республикысе вич объектыште паша тӱҥалшаш да молат.