Марий Элым вуйлатыше «122» службын пашаже дене кылдалтше совещанийым эртарен

              Марий Элым вуйлатыше Александр Евстифеев «122» службын пашаже дене кылдалтше совещанийым эртарен. Тазалыкаралтыш, врач консультаций, вакцинацийлан возалтмаш шотышто калыкын обращенийже дене пашам ыштыше «122» службым ыштыме деч вара диспетчер- влак тӱжем дене йодышым виктарен колтеныт. Кокла шот дене ик суткаште тиде номерыш шӱдӧ утла йыҥгыр пура. Александр Евстифеев палемден: кызыт гына Россий тазалыкаралтыш министерстве гыч серыш пурен. Тушто Российысе субъектлаште тора гыч консультацийым пуымо режим дене медицина полышым пуаш колл-рӱдерлаште оператор- влакын чотыштым рашемдыме методикым колтымо. Ме тиде методике дене келшышын шкенан рӱдерыштына пашаеҥым ситарышаш улына, - манын тудо. Тазалыкаралтыш министр Марина Панькован мутшо почеш, «122» номерыш пурышо йыҥгыр медицина организацийлашке, вашке полыш станцийыш, «Ропотребнадзорын» шокшо линийышкыже, эмым ситарыме тӧнежлашке колталтеш. Линийыште кызыт 8 оператор пашам ышта, тачысе кече гыч 23 медицина организаций да 27 оператор паша деке ушалтеш. Кӱлеш годым студент-волонтёр- влакат полшат. Александр Евстифеев республикысе информатизаций да кыл Департаментын вуйлатышыжлан «шокшо линий» ден «колл-рудерлашке» мыняр жап гыч йыҥгыртен шуаш лиймым да пашан качествыжым терген шогаш кӱштен.