Идалыкын лектышыже почеш тений федерал бюджетын оксажым кучылтмаш 99 тичмашат 6 луаш процент лиеш

              Идалыкын лектышыже почеш тений федерал бюджетын оксажым кучылтмаш 99 тичмашат 6 луаш процент лиеш. Республикысе да федерал бюджет оксам кучылтмо йодыш нерген Александр Евстифеевын эртарыме совещанийыште ойлымо. Тӱҥ докладым промышленность, экономически вияҥмаш да торговля министр Станислав Крылов ыштен. Тудо палемден: идалык мучко мониторингым эртарен шогымо. Оксам кучылташ ыштыме ешартыш соглашений- влакым шотыш налын, тений тудын кугытшо 27 миллиардат 700 миллион теҥге лиеш, але 99,6 процент. Финанс министр Алексей Торощин тений республикын бюджетшым кучылтмо нерген ойлен. Тенийлан бюджет оксам кучылтмо план 46 миллиардат 800 миллион теҥге лиеш. Совещанийыште кугыжаныш пого объект- влакым чоҥаш да пужен ышташ проектно-сметный документацийым ямдылаш оксам кучылтмо йодышым посна ончымо. Александр Евстифеев «Мариграждан проект» институт дене пашам чак виктараш кӱштен. Институтшымат базовый семын уэмдаш да уэш нӧлталаш кӱлеш манын: профессионал кадр- влакым пӧртылташ, материальный базыжым ышташ. Совещанийын лектышыже почеш кугыжаныш кучем да верысе самоуправлений орган- влаклан ойырымо оксам идалык мучаш марте тичмаш кучылташ кӱштымӧ.