У чарымашым огыт пурто, улшыжымат огыт кораҥде

                Марий Эл ПЦР йӧн дене Ковидлан калыкым тестироватлыме дене Элыштына 15-ше верым айла. Тиддеч ончыч тудо 85-ше верыште ыле. Кызыт тестированийын кӱкшытшӧ шӱдӧ тужем еҥлан шотлымаште 410-ым эртен. Тидын нерген Марий Элым вуйлатыше Александр Евстифеевын эртарыме совещанийыште ойлымо. Тазалыкаралтыш министр Марина Панькован мутшо почеш тидлан йӧным Марий Эл правительствын шке жапыштыже оксам ойырымыжо ыштен. Икмыняр показатель дене республике сай кӱкшытыштӧ улеш. Но лишемше У ий канышым шотыш налын, пандемий йодышым кораҥдыме манаш ок лий. Пайрем жапыште тудо ешаралт кертеш. Кызыт эмлалт лекше- влакын чотышт эмлаш пышытме- влак деч шукырак улеш. Доктор- влаклан тау, - каласен республикым вуйлатыше. Пытартыш лу кечыште инфекций стационарлаште 240 койкым шагалемдыме. Кызыт 8 тӧнежыште 815 койко кодеш. Нуным 66 процентлан айлыме. Вакцинацийын темпше российысе деч кугурак, но ончычсо тылзе деч шагалрак. Роспотребнадзор виктемым вуйлатыше ден тезелыкаралтыш министрын мутышт почеш, ешартыш чарымаш- влакым пурташ кӱлешлык уке, ситуаций тӧрем толеш. Йоча- влак тунемме чырыкым шке жапыштыже мучашлат. Нунылан У ий ёлкым уло школ дене огыл, а посна класс але группо дене, ача- ава-влак деч посна эртараш кутырен келшыме. Кызыт улшо чарымаш- влакым кораҥдаш але эр,- палемденыт погынымашыште. Пайрем кече- влак лишемыт гынат, вакцинаций рӱдер- влак пашам ышташ тӱҥалыт.