Юл кундемым правительствын вич инициативыже почеш вияҥдаш тӱҥалыт

                  Юл кундемым правительствын вич инициативыже почеш вияҥдаш тӱҥалыт. Нунын дене Россий правительстве председательын алмаштышыже Дмитрий Чернышенко палдарен. Тиде- «Юл кундемын ару вӱдшӧ», «Юлысо путешествий», «Юл кундемын регионысо медициныже», «У производство технологий- влак» да «Писын кудалыштше тӱшка электротранспорт». Нуно икте-весым пойдарен да ваш полшен шогат. Мутлан, «Юлысо путешествий» округысо шым кундемын турист проектыштым ушен шога. Пырляже нуно ик калыкле эҥер турист маршрутым ыштат. «Юлысо путешествий» округышто 13 тӱжем у пашаверым ышташ полша. Шым регионышто лу причал ден эҥер вокзалым, 20 у турист объектым чоҥаш, округысо субъектлаште эҥер флотым уэмдаш палемдыме. Округысо «Юл путешествий» проектыш Марий Элат пурен. «Марий Эл Юл эҥерыште этнографий туризмын рӱдерже» проект почеш кум причалым чоҥыман, ныл вере эҥер серым пужен ыштыман, у объект- влакым чоҥыман, тӱвыра поянлык объект- влакым пужен ыштыман. Моло инициативыжат сай вашталтышым ышташ полшат.