Элна мучко калыкын икоян улмо кечыже палемдалтеш гын, Марий Элна шкенжын шочмо кечыжым палемда

             Эрла- кугу пайрем. Элна мучко калыкын икоян улмо кечыже палемдалтеш гын, Марий Элна шкенжын шочмо кечыжым палемда. Республикысе калыкым нине пайрем дене Марий Элым вуйлатыше, Республикысе правительствын председательже Александр Евстифеев саламла. Россий –Кугу эл. Тудын вий ден куатше калыкын ик шонымашан улмыштыжо да таҥ шогымаштыже улеш. Мемнан кугыжанышын ятыр курыман историйыштыже еҥ-влакын шочмо элым йӧратымышт, икгай шонымашышт элнам сеҥымаш- влак деке конденыт, тӱрлӧ нелылыкым сеҥаш полшеныт. Тидыжат символ шотан: нылымше ноябрьыште Марий Эл Республикын кечыжат палемдалтеш. 101-ше ий мемнан кундемна чолган вияҥеш. Республикысе калыклан уло мо дене кугешнаш. Кундемнам вияҥдаш кугу полышым калыкле проект- влак, индивидуал программе, моло федерал да регионысо программе- влак полшат. Тений гына калыкле проект- влак кышкарыште социал кӱлешан 22 объектым пашаш колташ палемдыме, 13-шым пашаш колтымо. Нунын коклаште Марий филармоний, Медведевыште йоча сад, 6 фельдшер-акушер пункт, вертолёт площадке, кок стадион-площадке, Красногорскийысе футбол пасу. Республикыште у автовокзалым почаш ямдылат, Перинатал рӱдерыш 
оборудованийым шындат. Волжскышто азам ыштыме пӧрт чоҥалтеш, школ, йоча сад, спорт объект-влак чоҥалтыт. Чыла вашталтышыжат пӱсын шогышо йодышлам виктарен колташ да калыкын илышыжым саемдаш ышталтыт. Марий Элын тӱҥ поянлыкше мутат уке, тыште илыше калыкше. Элжым, пашам йӧратымашыже, шочмо кундемжын ончыкылыкшо верч шонымашыже ӱшанлын иквереш ончыко каяш, у сеҥымашлашке шуаш полшат. Тек тиде кок пачаш пайрем икоян улмын, улан илышын, пеледмашын символжо лийыт,- ойлалтеш республикым вуйлатышын саламлымашыштыже.