Чоҥымаш министерстве коллегийын заседанийыштыже кодшо ийысе пашам иктешлыме

                  Теҥгече Конгресс- влак Полатыште республикысе чоҥымаш, архитектура, илыме вер да коммунал озанлык министерстве коллегийын кумдаҥдыме заседанийже лийын. Тудын пашаштыже республикым вуйлатыше Александр Евстифеев лийын. Тушто кодшо ийысе пашам иктешлыме да 2021-ше ийлан задаче- влак нерген мутланыме. Республикым вуйлатыше палемден: чоҥымо отрасль регионым ончыко наҥгайыше да экономикылан кушкаш полшышо ик эн тӱҥ вий улеш. Республикыште калыкле проект- влак шыҥдаралтыт. Нунын цельышкышт шумаште чоҥымо отрасль тӱҥ верым налеш. Кодшо ийысе лектыш семын вуйлатыше теве мом ончыктен: ныл йоча садым почмо, у школым пашаш колтымо, Волжск олаште школын кокымшо корпусшым ыштен шуктымо, Козьмодемьянскыште поликилинике пашам ышта, илыме верым план деч шукырак чоҥымо. Тений Марий филармоний, Перинатал рӱдер, эше ныл йоча сад ямде лийшаш улыт. Тыгак Калык- влакын келшымаш пӧртыштым, Волжскышто азам ыштыме пӧртым, Медведевыште у школым чоҥаш тӱҥалме, вӱдым ситарыме да спорт оралте- влак ышталтыт. Кажне объектшат контрольышто улеш. Аварийный пӧрт- влак кораҥдалтыт, у пӧрт- влак нӧлталтыт. Доклад мучашыште Александр Евстифеев чоҥышо- влаклан у сеҥымашым тыланен да ойыртемалтше- влаклан наградым кучыктен. «Маркоммунэнергон» газ слубыжын начальникше Александр Костромин «Республикысе илыме вер да коммунал озанлыкын сулло пашаеҥже», «Энергия» акционер ушемын директоржо Илья Соловьёв «Республикын сулло энергетикше» чап лӱм дене палемдалтыныт. Икмыняр еҥ Республикын Чап грамотыжым налын. Торжественный ужаш деч вара колегийын заседанийыштыже палемдыме: 2025-ше ий марте 2,9 миллион квадрат метр илыме верым чоҥыман. Тений 363 тӱжем квадрат метр илыме верым ыштен шуктыман. Чоҥышо комплексын вийже дене республикым газифицироватлыме пашат шукталтеш. Республикысе яллашке газым пуртымо сомыл 78 процентыш шуын. Погынышо- влак тыгак калыкле проект да индивидуал программе кышкарыште чоҥымо пашан кузе кайымыжым каҥашеныт.