Александр Евстифеев корным олмыктымо качествым кажне кечын терген шогаш кӱштен

                   Александр Евстифеев корным олмыктымо качествым кажне кечын терген шогаш кӱштен. Республикым вуйлатыше «Лӱдыкшыдымӧ да сай качестван автомобиль корно- влак» калыкле проектын «Регионысо да верысе корно сеть» регионысо проектшым шыҥдарыме йодыш дене совещанийым эртарен. Тушто палемдыме: калыкле проектын кок ий ыштыме жапыште республике ончылно шындыме задачым тӱрыс шуктымо. 2019-ше ийыште планым 22 меҥгылан, 20-шо ийыште 30 меҥгылан эртарен темыме. Кодшо ийын чылаже 170 меҥге кужыт республике кӱкшытан корным ачалыме. Тений задачым шукташ кок миллиардат 800 миллион теҥгелан 18 контрактым ыштыме. Тидыже 187 меҥге кужыт корным норматив марте шукташ йӧным пуа. Тиддеч посна ола агломерацийыште корным олмыкташ 341 миллион теҥгелан контрактым ыштыме. Тиддеч посна Россий правительствын пунчалже почеш регионысо корным олмыкташ 399 миллионым, оласе магистральым чоҥаш 570 миллион теҥгем ойырымо. Тидымат ушештарыме: регионысо корным олмыкташ ешартыш соглашенийым ыштыме да тудын дене келшышын 35 процент корным огыл, а 45 процентым норматив марте шуктыман. Тыге ешартыш 300 меҥге корно олмыкталтшаш. Ынде эше кугемден толаш кӱлеш. Сандене пашаште нимогай кӱрытыш лийшаш огыл, кече еда терген шогыман,- каласен Александр Евстифеев. Калыкле проект почеш пашам 2023-шо ийлан мучашлаш палемдыме. Сандене тений эше ешарен 125 меҥге кужыт урем корным олмыктыман. Материалым ситышын ямдылыме. Кӱлеш 365 тӱжем тонн гыч, 90 процентшым шапашлыме. Нуно асфальтобетон заводлаште улыт. Ситыдымыже 15-ше май марте толын шушаш. 350 наре вагон тиде кечылаште толшаш. Корным олмыктымо дене пырля тротуар- влакымат мондыман огыл, -каласен Александр Евстифеев.