Миллион утла теҥгеаш чодырам руэн

                   Медведево районышто полиций пашаеҥ- влак чодырам шолып руышо еҥым кученыт. МВД-н Уголовный розыск виктемжын сотрудникше- влак Медведево районысо коллегышт дене пырля Оршанке район гыч 47 ияш пӧръеҥым кученыт. Рашемын: тудо кок тылзе наре чодырам руышо бригаде дене пырля Куяр лесничестве кундемыште пушеҥгым пӱчеденыт. Бригадыже озаштын шолып руымыж нерген пален огытыл. Руымашке поснак оролымо верыште иман да лышташан пушеҥге- влак логалыныт. Тыге чодыра фондлан ик миллион утла теҥгеаш эҥгек ышталтын. Уголовный пашам тарватыме. Ынде тиде осал пашам виктарышылан кум миллион теҥге марте штрафым тӱлыктен але шым ий марте эрык деч посна коден кертыт.