Округын таҥасымашыже мемнан дене погына
Эстетик гимнастике дене Юл кундем округын чемпионат ден первенствыже Марий Элыште лиеш. Тиде таҥасымаш республикыштына икымше гана погына. Тудо «Дружба» стадионын теннис кортыштыжо эртаралтеш. Эстетик гимнастике – тиде художественный гимнастикым, куштымашым да акробатикым ушен шогышто спорт. Таҥасымашке Татарстан, Башкортостан, Удмуртий, Саратов, Самара, Пенза, Угарман областьла да Пермь край гыч 500 наре спортсмен толеш. Марий Элын чапшым «Олимп» Спорт полатын да Медведево кыдалаш школын командышт аралаш тӱҥалыт. Таҥасымашым почмо парад да икымше награждений- влак 15-ше апрельыште 13 шагатат 40 минутлан лийыт. Ӱчашымаш- влак 14-ше гыч 17-ше апрель марте эртат.