Александр Евстифеев «Автодор М» асфальтобетон заводыш миен
Марий Элым вуйлатыше корным чоҥымо аланыште у инвестиций проектын паша куатшым аклен. Паша дене коштмо кышкарыште Республикым вуйлатыше Александр Евстифеев «Автодор М» асфальтобетон заводыш миен да коллектив дене мутланен. «Автодор М» иземдыме ответственностян ушем корным чоҥымо пашам шуктышо компаний. Тудо Российысе рынкыште шкенжым сайын ончыктен. Тений идалык тӱҥалтышыште производствым Марий Элыштат почмо. Асфальтобетон заводым да корным чоҥымо да олмыктымо пашам шотыш налын призводство базым вияҥдаш инвестицийым 120 миллион теҥгем пыштыме. Компаний паша кугытшым ӱшанлын ешарен толеш. Предприятийын генеральный директоржо Олег Малов Александр Евстифеевлан асфальтым варыме установкым да образецым тергыме лабораторийым ончыктен. Установко ик шагатыште 165 тонным ыштен луктеш, у технологий кучылталтеш. Продукцийлан 6 ийлан гарантий пуалтеш. Тыште кокла пашадар 50-60 тӱжем теҥгеш шуэш.