13 тӱжем наре еҥ келге диспансеризацийын икымше йыжыҥжым эртен
13 тӱжем наре еҥ келге диспансеризацийын икымше йыжыҥжым эртен. Кодшо ийын Ковид деч эмлалт лекше 12 тӱжемат 996 еҥ келге диспансеризацийын икымше йыжыҥжым эртен. Икымше йыжыҥыште пациент- влакым врач-терапевт але тӱшка практикын врачше онча. Тиддеч посна икмыняр обязательный диагностике эртаралтеш. Тиде- вӱрыштӧ кислородын мыняр улмыжо, шодо ден кукшылогарын могайрак улмышт, шӱм да вӱргорно системын пашажым, тромб лийын кертме лӱдыкшым, вӱрын анализшым, оҥ тураште рентгеным ыштат. Осложнений рашемеш гын, диспансеризацийын кокымшо йыжыҥже кӱлеш лиеш: шӱмлан УЗИ-м, шодылан КТ-м ыштат, йолысо кугу вӱргорным шымлат. Келге диспансеризацийым эртыше- влак кокла гыч 34 процентше кок але утларак черышт рашемын, 54 процентын ик хронический черышт уло. Икымше йыжыҥ почеш 600 утла еҥым кокымшо йыжыҥыш колтымо. Эртыше ийын июль гыч декабрь марте диспансеризацийыште икымше гана тӱжемат 35 хронический черым рашемдыме. Тушечын 24 утла процентше вӱргорно системе, шым утла процентше пищеварений дене кылдалтше чер, 60 утла процентше моло чер улыт.