Волжский районысо Сотнур селаште почтым олмыктат

             Волжский районысо Сотнур селаште почтым олмыктат. Икмыняр ий ончыч меҥге дене чараклыман Сотнур почто кыл пӧлкан фотосӱретшым верысе газетын сайтыштыже савыктымеке тӱрлӧ шонымашым каласкаленыт. Кызыт тушто куан да ӱшан озаланат- вашталтме жап шуын. Почто пӧлкам вуйлатыше Лидия Иванован мутшо почеш зданийым ятыр ий дене олмыктымо огыл. Тымарте тудо сайынак шолдырген. 12 ий ончыч эше утларак шолдыргаш тӱҥалын. Тунам КамАЗ зданийыш керылт пурен, пырдыж шелын каен. 2021-ше ийыште шошым тӱҥ леведыш гыч веранде ӱмбак кугу неле лум волен возын да пырдыж торлен. Лач тунам тудым пырня дене чаракленыт. Теве июнь тӱҥалтышыште ялласе почто пӧлкам уэмдыме федерал программе почеш шукертсек вучымо капитально олмыктымаш тӱҥалын.
              Фото: «Волжская правда».