Православий йӱлам кучышо- влак таче кече гыч Успений пӱтым кучаш тӱҥалыныт

           Республикысе православий йӱлам кучышо- влак таче 14-ше август гыч Успений пӱтым кучаш тӱҥалыныт. Тудо кок арня шуйна: 14-ше гыч 27-ше август марте. Йӱла почеш тудо Мӱй спас дене тӱҥалеш. Тиде кечын чыла храмыште пайрем службо- влак эртеныт да у мӱйлан шнуй шӱлышым пуртымо чиным шуктеныт. Успений пӱтӧ кум спасым ушен шога: 14-ше августышто Мӱй спасым, 19-ше августышто Олма, 29-ше числаште Пӱкш спасым. Успений пӱтӧ пеҥгыдылан шотлалтеш. Тудын жапыште саскам, емыжым, шӱрашым, поҥгым, киндым, пӱкшым, мӱйым кочкаш лиеш. Но шылым, шӧр продуктым, муным кочкаш огыт кӱштӧ. Колым ик гана веле- Юмын вашталме пайремыште 19-ше агустышто кочкаш лиеш.
            Фото: Мӱй спас (архив).