Марий Элым вуйлатыше ден Озаҥ олаште Китай калык республикын Генеральный консулжо вашкылым вияҥдаш лиймым каҥашеныт

              Марий Элым вуйлатыше ден Озаҥ олаште Китай калык республикын Генеральный консулжо вашкылым вияҥдаш лиймым каҥашеныт. Теҥгече Марий Элыш Генеральный консул Сян Бо-н вуйлатыме делегаций толын. Марий Элым вуйлатыше Юрий Зайцев Китай дене кылым пеҥгыдемдымаш республикын правительствыжлан приоритет йодыш манын палемден. Китайыш мийыме годым рашемын: вашкыл парламент коклаште гына огыл, экономикыштат кӱлешан. Кыл микроэлектроникыште, туныктымаште, туризмыште вияҥшаш. Сян Бо Марий Эл ден Китай коклаште кылым вияҥдаш да пеҥгыдемдаш йӧным ышташ да полшаш ямде улмыжо нерген каласен. Марий Эл Правительствын да Генеральный консульствын еҥже- влак сатум ужалкалымым кугемдыме, ял озанлыкыште, тӱвыраште, туныктымо пашаште да моло гуманитар аланыште вашкыл нерген планым радамлын каҥашеныт да раш ошкыл- влакым палемденыт.
             Фото: Марий Элым вуйлатышын  администрацийжын увер дене пашам ыштыше пӧлкаже.