Марий Элысе велосипедист- влак корнышто коштмо правилым огыт пале

             Марий Элысе велосипедист- влак корнышто коштмо правилым огыт пале. Тыгай иктешлымашым кугыжаныш автоинспекцийын пашаеҥже- влак «Веломототранспорт» профилактике мероприятий кышкарыште тӱжемат пеле еҥым тергымеке ыштеныт. Тергыме кажне визымше велосипедистшым мут кучаш шогалтыме. Эн шуко нарушитель Йошкар-Олаште, Волжскышто да Медведево районышто рашемын. Утларакше велосипед оза- влак корным вончымо годым йоҥылышым ыштат- велосипед гыч огыт воло. Самокат дене коштшо- влакат правилым пудыртат: йолешке вончем ончылно транснпорт гыч огыт воло, конструкцийже келыштаралтын огыл гынат, вес еҥым шынден наҥгаят, мопед дене тӧр шотлымо скутер дене удостоверений деч посна коштыт. Мототранспортын кажне кумшо водительжым административно мут кучаш шогалтыме. Южо транспортшым спец стоянкыш вераҥдыме. Полиций пашаеҥ- влак мопед, скутер, мотоцикл дене коштшо- влаклан кудалме лӱдыкшыдымӧ режимым ойырен налаш, шлемым чияш да моло аралыше средствым кучылташ темлен ойленыт.
             Фото: ГИБДД виктем.