Йошкар-Олаште тошто барак- влак олмышто у пӧрт- влакым чоҥат

           Йошкар-Олаште тошто барак- влак олмышто у пӧрт- влакым чоҥат. Тиде Гагарин проспект, Панфилов, Первомай, Успенский уремла кокласе квартал нерген ойлалтеш. 2020-шо ий ноябрьыште Ола администраций дене «Блокстрой» ушем коклаште тиде кумдыкым вияҥдаш ойпидышым кылдыме. Застройщик проектым куд ийыште шуктышаш. Тушкак тошто пӧрт- влакым кораҥдымаш, тушто илыше- влакым кусарымаш, у илыме верым чоҥымаш да кундемым тӱзландарымаш пурат. Тыге тошто куд барак олмеш 9 пачашан кок у пӧрт лиеш. Панфилов уремыш лекме корно кумдаҥеш, йӱрвӱд канализаций, йоча площадке, машинам шогалтыме вер да молат лийыт. Кызыт калыкым кусарен пытарыме манаш лиеш, ик пӧртым рончаш кодын. Тыге рӱдӧ олаштына кок тӱжемат 827 квадрат метр аварийный илемым пытарыме лиеш. Йошкар-Ола мэрын алмаштышыже Алексей Игитовын мутшо почеш, лишыл жапыште тыгаяк проектым Димитров уремыште тӱҥалыт.
            Фото: ВНД.