Тений Марий Элыште 376 меҥгыш шуйнышо 72 корно объектым норматив марте шуктат

            Тений Марий Элыште 376 меҥгыш шуйнышо 72 корно объектым норматив марте шуктат. Москошто лиймыже годым Марий Элым вуйлатыше Юрий Зайцев Федерал корно агентствым вуйлатыше Роман Новиков дене вашлийын. Республикым вуйлатыше «Качестван лӱдыкшыдымӧ корно» калыкле проектым шыҥдарымаште сеҥымаш- влак нерген, ончыкылык план, корно сетьым ончыкыжым вияҥдыме нерген каласкален. Федерал корно сеть агентствым вуйлатыше калыкле проектын цельышкыже шумо шотышто республикысе Правительствын пашажлан кӱкшӧ акым пуэн, корно лӱдыкшыдымылыкым кугемдыме шотышто сай пашам палемден да ешарен: 2025-ше ий марте регионысо 496 меҥге утла корным норматив марте шуктыман, тыгак опорный сетьыш пурышо 28 меҥге наре кужыт корным олмыктыман манын. Регион ончылно шындыме чыла задаче шукталт толеш, аварийность иземеш,- каласен Роман Новиков. Тудо тыгак Йошкар-Оласе Киров ден Строитель уремым ушышо магистраль уремын кокымшо йыжыҥжым чоҥен пытараш Правительствын шонымашыжым поддержатлен. Пашам 2025-ше 2028-ше ийлаште ышташ палемдыме. Вашлиймаште тыгак федерал корно сетьыште ончылно шогышо паша- влакым каҥашеныт. Теиий да шушаш ийын 106 меҥгым норматив марте шукташ палемдыме. Шым участкыште але 90 меҥге утла кужытышто 2024-ше ий мучаш марте олмыктышаш улыт. Тиде- Йошкар-Ола- Зеленодольск- М-7 «Волга» автокорно, Р-177 «Поветлужье» Нижний Новгород- Йошкар-Ола, Р-176 «Вятка» Чебоксары- Йошкар-Ола- Киров-Сыктывкар корно- влак нерген ойлалтеш.
             Фото: Марий Элым вуйлатышын  администрацийжын увер дене пашам ыштыше пӧлкаже.