Тунемше- влаклан коррупций ваштареш шогаш шинчымашым пуат

Республикысе 32 тӱжем утла тунемше коррупций ваштареш туныктымо программе почеш шинчымашым налын. Теҥгече Правительстве пӧртыштӧ Республикым вуйлатыше Александр Евстифеев коррупций ваштареш шогышо комиссийын черетан заседанийжым эртарен. Тудын радамыште Россий правительствын пеҥгыдемдыме коррупций ваштареш йоча- влакым туныктымо программын калыкле планжын посна положенийже- влакым шуктымо йодышым каҥашыме. Республикысе туныктыш министр Наталья Адамова палемден: тунемше- влакын коррупций ваштареш шонымашыштым шуарымаш «Право», «Обществознаний», «Историй», «ОБЖ» предмет дене уроклаште эртаралтеш. Тушто тӱрлӧ теме каҥашалтеш, класс шагат- влак эртаралтыт. Тиде мероприятийла дене 32 тужем утла тунемшым авалтыме. Килемар, Советский, Медведево район да Козьмодемьянск оласе икмыняр тунемме тӧнежыште йоча- влак коррупций теме дене буклетым, листовкым да памяткым ямдыленыт. Эртыше ийын школлаште тиде теме дене 30 утла мероприятийым эртарыме. Каҥашыме почеш Александр Евстифеев туныктыш министерствылан 15-ше август марте агитаций материал- влакым ышташ, а 1-ше апрель марте тунемме программым писештараш кӱштен. Тыгак комиссийын еҥже- влак правам аралыше орган- влакын коррупций ваштареш виктаралтше мерыштын лектышыжым каҥашеныт. Мучашлан республикым вуйлатыше коррупций ваштареш виктаралтше пашам вияҥден колташ кӱштен.