Кодшо арнян 9 еҥлан грипп чер пижын
Кодшо арнян республике мучко кум тӱжемат 57 еҥ ОРВИ дене черланен. Тидыже эпидемий кӱкшыт деч 13,8 процентлан шагалрак, но ончычсо арня деч 30 процентлан шукырак. Тиде жапыште 9 еҥлан грипп чер пижын. Нунын кокла гыч 8-ыже кугыеҥ улыт. Черланыше- влак Йошкар-Ола, Волжск, Медведево, Параньга да Советский районлаште илат. Иктыжат грипп ваштареш привикым ыштыктен огыл. Черланыше- влак шукеммылан кӧра кодшо арнян кум школысо ныл классыште да кум йоча садысе кум группышто занятийым жаплан чарыме ыле.