Кугыжаныш Погынышто Россий Конституцийыш вашталтышым пуртымо шотышто Советын заседанийже лийын
Теҥгече Марий Эл Кугыжаныш Погын вуйлатыше пелен Россий Федерацийын Конституцийышкыже Президентын темлыме вашталтышым пуртымо шотышто Советын черетан заседанийже лийын. Ушештарена: тыгай темлымашым Элнам вуйлатыше 15-ше январьыште Федерал Собранийлан ойлымо посланийыштыже каласен ыле. Владимир Путинын кӱштымашыже почеш, вашталтышым пурташ ямдылыше пашаче группым ыштыме. 23-шо январьыште Федерал Собранийын ӱлыл палатыже темлыме закон проектым икымше лудмаште сайлан шотлен. Кокымшо лудмашыже 11-ше февральыште лийшаш. Кугыжаныш Погыным вуйлатыше Анатолий Смирнов совещанийыште поснак кугу тӱткышым публичный кучемын верысе единый системын принципшым, полномочийым кумдаҥдыме да самоуправленийын мом ыштен кертмыжым Конституцийыште пеҥгыдемдаш темлыме тӧрлымаш- влак деке ойырен. Кугыжаныш Погын Аппаратын правовой виктемже Россий Конституцийын кызытсе да темлыме редацийжым таҥастарен ончыктышо анализым ямдылен.